“إنت مجنون؟! إيه الهبل ده!” (فيديو)

علّق الإعلامي أحمد شوبير على الرسالة اللي كتبها ماركوس ماركيس، مدرب حراس مرمى فريق اليد السابق في الزمالك، بعد ما سافر من مصر، واللي كانت مثيرة للجدل بشكل كبير.

وقال شوبير في برنامجه الإذاعي صباح النهارده: “أمس فوجئنا بـ ماركوس ماركيس، مدرب حراس اليد في الزمالك، كاتب رسالة بيتكلم فيها عن شخص من الأهلي ساعده في الرحيل، وناس بقت هايصة مع الهيصة، وده خلاني اتخض بجد”.

وتابع: “أيًا كانت انتماءاتك، أهلي أو زمالك، فيه حاجات ما ينفعش تتقال، ما ينفعش تقول كلام ضد بلدك وتبقى مبسوط، الراجل كاتب (سأكشف كل شيء لما أرجع أنا وأسرتي لبلدي بأمان).. آمان إيه يا بني؟ هو إحنا عندنا حاجة في مصر تخوّف؟! إنت مجنون ولا إيه!”.

وأضاف: “الكلام ده غامض جدًا، والناس هتفهم منه إيه؟ يعني مصر مش أمان؟! إيه الهبل ده؟! الزمالك رد رسميًا على لسان شريف صفوت، منسق المدربين الأجانب، وقال إن المدرب فسخ العقد بالتراضي، ووقّع على كل حاجة، وسافر بشكل ودي”.

واستكمل: “وبصراحة، المدرب ده ما عملش حاجة خارقة، لا خد دوري ولا كأس، والنادي كان مجهز له تذكرة سفر رايح جاي بتاريخ 30 مايو، لكنه طلب يمشي بدري علشان ظروف أسرية، والنادي قال له لو هتمشي بدري ادفع الفرق، لأنه هيكلفهم 70 ألف جنيه. كمان رفض يحضر ماتش الأهلي والزمالك في نهائي الكأس، فالنادي وقّع عليه غرامة”.

واختتم شوبير: “اللي عمله الزمالك ده حلو، بس الغريب إننا بقينا (بنظيط)، وده خطر.. التنافس مش لازم يوصلنا للمرحلة دي، لازم نحكم عقلنا، نضحك ونمزح مفيش مشكلة، زي ما بعمل مع عمرو أديب، لكن اللي بيقوله ماركيس ده لما يقول (هتكلم لما أكون في أمان)، ده كلام مرفوض تمامًا.. ده شغل عبط”.