أشتغل على نفسك.. عدلي القيعي يواصل التصريحات ضد أعضاء مجلس إدارة الزمالك و عن الفنان أحمد السقا “بلاش تتكلم ف الكورة”

شن عدلي القيعي، رئيس شركة الأهلي لكرة القدم، هجومًا ضد نيرة الأحمر عضوة مجلس ادارة الزمالك .

و قال القيعي في تصريحات عبر قناة الأهلي: اشتغل على نفسك مفيهاش حاجة، لكن تعيشلي بقى في فيلم تفريغ الزمالك لا، هل الكوباية أقدر أفرغها لو هي فارغة؟ لا، طيب لو فيها شاي هل لو فرغتها هتفرغ شربات؟! لما الشربات يكون بره وأنا أخذته وإنت في يوم من الأيام كنت حاطط الشربات ده عندك، تقوم تقولي إنت بتفرغني من لاعيبتي؟ هو كان عندك عشان تقول بتفرغ لاعيبتي، هو إزاي أفرغ حاجة مش موجودة عندك، لا اشرف بن شرقي كان عندك ولا إمام عاشور كان عندك.

اسأل نفسك كيف تم التجديد الفترة الماضية.. الأهلي لو كان عايز يتدخل ويعرض الأموال الطائلة كان تدخل، ولم تكن الدنيا غالية أوي كده، لكن أراد أن يراعي ظروف حرجة كان يمر بها المنافس، وكان المقابل إللي احنا بنسمعه اليوم واللي أسوأ منه قبل كده.

يا أستاذ أحمد السقا يا فنان يا محترم، بلاش تتكلم في الكرة وسيبها للناس اللي عايشين فيها، لكن تيجي تقولي الزمالك هيلاعب الزمالك، ده كده يبقى الأهلي طول عمره بيلاعب الأهلي، ومتأخذنيش حطلي بقى من الـ 12 يطولة اللي أخذتوها 10 بطولات على بطولات الأهلي.