محمد رمضان كان عايزني مستشار نفسي ليه وقال كلام على كولر مش هقوله إلا لإدارة الأهلي!! فيديو

كشف عماد فاروق، الخبير النفسي الرياضي، عن تفاصيل مثيرة حول تجربته مع النادي الأهلي، حيث أوضح أن هناك العديد من الخلافات التي حدثت بينه وبين محمد رمضان المدير الرياضي، خاصةً حول المسمى الوظيفي والمؤهل العلمي، وكذلك حول شروط العقد المادي.

وقال عماد فاروق في تصريحات عبر برنامج “الماتش”، على قناة “صدى البلد”: “قبل مباراة العين ساهمت في إدارة أزمة، لأن الفوز في مباراة السوبر المصري كان على شعرة، والكابتن رمضان كان مرتبك جدًا، لأن لو خسرنا أمام العين هيضيع مكسب السوبر المصري وهيفكرنا بالهزيمة في السوبر الإفريقي”.

وتابع: “وكان في بيننا توافق في التعامل مع الأزمة، أنا راجل متخصص وأحترم أي إداري يسأل لكي يعرف، وأنا أؤكد على التوافق بيننا، وانتهت مباراة العين وبفضل الله الذي شخصته وقلته لـ محمد رمضان ما يفعله هو ما حدث وساهم في الفوز”.

وأضاف: “هي طريقة غير مباشرة تجعل اللاعب ينتج بدون أن تطلب منه ذلك، عن طريق تسلسل الحافز لصنع الفارق، وأنا نصحت محمد رمضان بإجراء واحد وفعله أدت إلى هذه النتيجة”.

واستكمل: “في اليوم التالي الكابتن رمضان كلمني وطلب مني أحضر لكي نتحدث في المقابل المادي، وأنا لم أكن أشغل ذهني بهذا الأمر، لأنني أعلم جيدًا عندما أتحدث عن قيمتي سيحدث صدام، وكنت جاهز بالرد”.

وأردف: “الكابتن رمضان طلب مني أن أقول ما الرقم الذي أريده، قلت له أنت أعلنت إنني أحد أعضاء الجهاز الفني، وأنا من خلال البحث وجدت أن المساعدين المتخصصين لـ كولر يتقاضون من 15 لـ 20 ألف دولار، ولن أختلف معك”.

واستمر: “وبعد ما كان يشيد بي، فجأة قعد مثل رؤساء الشركات المليارديرات وقال لي هو إنت أجنبي، قلت له إيه العلاقة عشان الدولارات يعني.. أنا ممكن أخدهم بالمصري، قال لي لا أنا بسأل إنت أجنبي قلت له لا أنا مصري، قال لي طيب إيه إللي دخلك مع الأجانب، قلت له أنا عضو في الجهاز الفني سواء أجانب أومصريين، إنت مالك يا كابتن مأله الإجانب ليه”.

واسترسل: “قال لي هو إنت عارف أنا باخد كام، قلت له يعني مليون ونصف أو 2 مليون، قال لي لا أنا أخذ أقل بكثير، قلت له طيب هو الكابتن إبراهيم حسن مدير المنتخب أجنبي، هو يتقاضى مليون جنيه”.

وتابع: “بعدين قلت له خلاص يا كابتن إعرض إنت، قال لي إنتوا ليكوا سعر أصلًا يعني 20 ألف جنيه، وإللي قبلك كان بياخد كده وده سعركم يعني، طبعًا الأسلوب عجيب أوي، ده إنت يا كابتن معروف طريقتك وأدبك وإللي قاعد أمامك مؤدب وعنده تاريخ، فالأسلوب معجبنيش”.

وأشار: “قلت له بص يا كابتن سيبك من الموضوع الرخيص ده، أنا ربنا كارمني، أنا هتطوع للأهلي بوقتي كامل، ومش بس كده الأهلي هياخد عيوني، وهشارك الأهلي في شراء أي لاعب يضمه الأهلي، وجاهز لتوقيع العقد، قال لي الكابتن الخطيب مش بيوافق على التطوع، قال لي هنعرض عليه إنك من البداية كنت عايز تطوع”.

وأوضح: “الاتفاق تم ولم نختلف، وقال لي غدًا سأخبر الخطيب ونوقع العقد، قلت له والمسمى، قال لي لا المسمى أنا عايز أغيره وأخليه المستشار النفسي لمدير الكرة، قلت له لا الكلام ده مش هيتم خالص، قالي طيب تعالى دلوقتي أقدمك للاعبين الأول، ودخلت وبرضو قدمني على إني المعد النفسي”.

واستكمل: “وإحنا خارجين كان في تمرين، والمفروض إني كنت هتوجه للملعب، فهو لاقيته بيسلم عليا وبيقولي أشوفك بكرا، وقالي إن كولر مش هيقابلني، وإن كولر بيقول نشوف شغله الأول، واستحالة كولر يكون قال كده لأن المفروض يحصل تنسيق أولًا، فقال لي مش هتنزل الملعب قلتله أومال هشتغل مع مين وهنسق مع مين، قالي إنت هتتعبني يا عماد”.

وأضاف: “قلت له إنتوا عايزيني إيه أنا مش فاهم، إنتوا عايزيني واحد تخصصوله غرفة يجلس فيها هو إحنا في مستشفى ولا فاتحين عيادة، وبعدين أصلًا هو إنتم عندكم مكان لكده، قال لا إحنا كده مش متفاهمين خالص، وقفلت الدنيا على كده وبقى مبيبقاش يفهمني خلاص بعد ما كان في الأزمة بالنسباله بقول حكم، وبعدين شعرت إنه نفسه يرجع في كلامه، لأن كان قبل الماتشين حاجة وبعد الماتشين حاجة وسحب كل إللي اتفقنا عليه”.

واختتم: “في كلام قاله محمد رمضان على شخصية كولر مش هينفع أقوله إلا لإدارة الأهلي، كولر لا يمكن يكون قال إني أشتغل الأول وبعدين نقعد، ده لا يمكن يكون كلام محترف”.