القيعي عن تسريب محادثة الفار: عارفين نكتة الراجل وزوجته الخائنة؟ – الهداف

علق عدلي القيعي على تسريب المحادثة بين الحكم محمد عادل وميدو سلامة خلال مباراة الزمالك والبنك الأهلي في بطولة الدوري والتي جاء فيها عدم اقتناع الحكم باستدعاء حكم الفار ورغم ذلك احتسب ضربة الجزاء لصالح الزمالك.

وقال القيعي عبر قناة الأهلي: “الناس ماسكة في الواقعة عمالين نقول هنعاقب اللي سرب وعمالين كل التحقيق مين اللي سرب مش الواقعة حقيقية ولا لأ ومعناها ايه والكارثة دي تعالج ازاي لكن مين اللي سرب؟ عاملة زي واحد دخل على مراته لقى معاه واحد مين ده يا مجرمة؟ قالت له انت ايه اللي جابك دلوقتي قال لها مين ده يا مجرمة؟ قالت له ما تغيرش الموضوع مين اللي سرب يعني انت مش معادك دلوقتي”.

وأضاف القيعي: “مين اللي سرب؟ دي آخر مشاكلك يا معلم انت وهو يا جماعة التحكيم مشكلته اسرة التحكيم مش برة اسرة التحكيم، اتفقوا انتم على بعض، كيف تنهضوا بالتحكيم الاول وان عندما تتفقوا قدموا نفسكم، انما صراعات صراعات صراعات. وكل واحد عايز يوقع التاني وبعدين تقولوا الأندية ما بتاخدش حقها امال تعمل ايه؟”.

يذكر أن لجنة الحكام قررت التحقيق مع طاقم تحكيم المباراة من أجل الكشف عن من قام بتسريب محادثة الفار وعقاب كل من يرتبط بهذه الواقعة.